പ്രണയസല്ലാപങ്ങൾക്കായി സ്വകാര്യയിടങ്ങൾ തേടുന്ന കമിതാക്കൾക്കായി വലവിരിച്ച് ക്യാമറക്കണ്ണുകൾ.

ഉദ്യാനങ്ങൾ, ബസ്‌സ്‌റ്റാൻഡുകൾ എന്നിവിടങ്ങൾ കേന്ദ്രീകരിച്ച്‌ ദൃശ്യങ്ങൾ പകർത്തി പ്രചരിപ്പിക്കുന്ന സംഘം പിടിയിലായതോടെയാണ്‌ കണ്ണൂർ ജില്ലയെ ഞെട്ടിച്ച രഹസ്യക്യാമറകളെ കുറിച്ചുള്ള വിവരങ്ങൾ പുറത്തുവന്നത്.

തലശേരി ഓവർബറീസ്‌ ഫോളിയടക്കമുള്ള വിനോദസഞ്ചാര കേന്ദ്രങ്ങളിൽനിന്ന്‌ ദൃശ്യങ്ങൾ പകർത്തിയവരാണ്‌ അറസ്‌റ്റിലായത്‌.

കമിതാക്കളുടെയും ദമ്പതിമാരുടെയും സ്വകാര്യതയിലേക്കാണിവർ ഒളിക്യാമറ തിരിച്ചത്‌. ദൃശ്യങ്ങൾ പ്രത്യേക ഗ്രൂപ്പുവഴി പ്രചരിപ്പിക്കുകയും ചെയ്‌തു. സെന്റിനറി പാർക്കിലെത്തിയ കമിതാക്കളുടെ ദൃശ്യം നവമാധ്യമങ്ങളിൽ വൈറലായതോടെയാണ്‌ പൊലീസ്‌ അന്വേഷണമാരംഭിച്ചത്.

സൈബർ സെല്ലിന്റെ സഹായത്തോടെയുള്ള അന്വേഷണത്തിലാണ്‌ കുറ്റവാളികളെ കണ്ടെത്തിയത്‌. അശ്ലീല സൈറ്റുകളിലും ദൃശ്യം അപ്‌ലോഡ്‌ ചെയ്‌തതായി പൊലീസിന് വിവരം ലഭിച്ചിട്ടുണ്ട്.തലശേരി കോട്ട, സീവ്യുപാർക്ക്‌ എന്നിവിടങ്ങളിൽനിന്നടക്കം ദൃശ്യം ചിത്രീകരിച്ചിട്ടുണ്ട്‌.

വിനോദസഞ്ചാര കേന്ദ്രങ്ങളിലെ പ്രത്യേക ഇടങ്ങളിലാണ്‌ ഇവർ ഒളിക്യാമറ സ്ഥാപിക്കുന്നത്‌. ഉദ്യാനങ്ങളിൽ പകൽ എത്തുന്നവരിലേറെയും വിദ്യാർഥികളാണ്‌. വിനോദ സഞ്ചാര കേന്ദ്രങ്ങളിൽ പൊലീസ്‌ നിരീക്ഷണം ശക്തമാക്കി. ഒളിക്യാമറ ദൃശ്യങ്ങൾ ക്യാമറയിൽ പകർത്തി സോഷ്യൽ മീഡിയയിൽ പ്രചരിപ്പിച്ച കേസിൽ രണ്ടു പേർ കൂടിയാണ് കഴിഞ്ഞ ദിവസം അറസ്റ്റിലായത്.

വിനോദസഞ്ചാര കേന്ദ്രങ്ങളിലെത്തുന്ന കമിതാക്കളുടെ ദൃശ്യങ്ങൾ ചിത്രീകരിച്ച്‌ സോഷ്യൽ മീഡിയയിലുടെ ഇവർ പ്രചരിപ്പിക്കുകയായിരുന്നു. കാർപ്പന്ററായി ജോലിചെയ്യുന്ന ഭിന്നശേഷിക്കാരനായ പന്ന്യന്നൂരിലെ വിജേഷ്‌ (30), സ്വകാര്യ ബസ്‌ കണ്ടക്‌ടർ മഠത്തുംഭാഗം പാറക്കെട്ടിലെ അനീഷ്‌ (34) എന്നിവരെയാണ്‌ പോലീസ്‌ പിടികൂടിയത്‌. വിജേഷ്‌ ചിത്രീകരിച്ച ദൃശ്യം അനീഷാണ്‌ മറ്റുള്ളവർക്ക്‌ വിതരണംചെയ്‌തതെന്ന്‌ പോലീസ്‌ പറഞ്ഞു. സംഘത്തിൽ കൂടുതൽ ആളുകൾ ഉൾപ്പെട്ടിട്ടുണ്ടോ എന്നതും അന്വേഷിക്കുന്നുണ്ട്‌.

കഴിഞ്ഞ ദിവസം മൂന്നുപേരെ കൂടി അറസ്റ്റ് ചെയ്തിരുന്നു ഈ കേസിൽ കൂടുതൽ രഹസ്യ ദൃശ്യങ്ങൾ പ്രചരിപ്പിക്കുമെന്ന് ഭീഷണിപ്പെടുത്തി പണം തട്ടുന്നവൻ റാക്കറ്റു തന്നെ പ്രവർത്തിക്കുന്നുണ്ടെന്നും അന്വേഷണ ഉദ്യോഗസ്ഥനായ തലശേരി ടൗൺ പൊലിസ് ഇൻസ്പെക്ടർ പറഞ്ഞു.

അധ്യാപകരും വിദ്യാർത്ഥികളുമടക്കമുള്ള നിരവധി പേർ ഈ സംഘത്തിൻ്റെ ബ്ളാക്ക് മെയിലിങിന് ഇരയായിട്ടുണ്ട്. പണം തന്നില്ലെങ്കിൽ സ്വകാര്യ ദൃശ്യങ്ങൾ പ്രചരിപ്പിക്കുമെന്നായിരുന്നു ഭീഷണി. ചൊക്ലി സ്വദേശിയായ വിജേഷ് ഭിന്നശേഷിക്കാരും അനീഷ് ബസ് കണ്ടക്ടറുമാണ് ദൃശ്യങ്ങൾ കൂടുതൽ പകർത്തിയത് വിജേഷും അപ് ലോഡ് ചെയ്തത് അനീഷുമാണ്. പ്രതികൾക്കെതിരെ ഇന്ത്യൻ ശിക്ഷാ നിയമപ്രകാരമുള്ള 119 എ, 356 സി, 66 ഇ എന്നിവകുപ്പുകളാണ് ചുമത്തിയിട്ടുള്ളത്. ഇവരെ പിന്നീട് സ്റ്റേഷൻ ജാമ്യത്തിൽ വിട്ടയച്ചു.