• ഗാന്ധിജി തന്റെ ജീവിതത്തിലെ 12 വർഷങ്ങൾ ചിലവഴിച്ച സബർമതി ആശ്രമം ദേശീയ അധ്യാപക കോൺഫറൻസിനെത്തിയ കേരള ടീം സന്ദർശിച്ചു

ഗുജറാത്തിലെ സബർമതി നദീതീരത്ത് ഗാന്ധിജി സ്ഥാപിച്ച ആശ്രമമാണ് സബർമതി ആശ്രമം (ഹിന്ദിയിൽ: साबरमती आश्रम; ഗുജറാത്തിയിൽ:સાબરમતી આશ્રમ). ഗാന്ധി ആശ്രമം, ഹരിജൻ ആശ്രമം, സത്യാഗ്രഹ ആശ്രമം എന്നീ പേരുകളിലെല്ലാം ഈ ആശ്രമം അറിയപ്പെടുന്നു.

അഹമ്മദാബാദ് നഗരത്തിൽ നിന്ന് വടക്കുമാറി പ്രശാന്ത സുന്ദരമായ സ്ഥലത്താണ് സബർമതി ആശ്രമം. ഗാന്ധിജി തന്റെ ജീവിതത്തിലെ ഏകദേശം 12 വർഷങ്ങൾ ഈ ആശ്രമത്തിലാണ് ചിലവഴിച്ച ത്.സബർമതിയെ ഭാരത സർക്കാർ ഒരു ചരിത്ര സ്മാരകമായ് പ്രഖ്യാപിച്ചിരിക്കുകയാണ്. ഇന്ത്യൻ സ്വാതന്ത്ര്യസമരത്തിലെ സുപ്രധാന നാഴികകല്ലായ ദണ്ഡിയാത്ര ആരംഭിച്ചത് ഈ ആശ്രമത്തിൽ നിന്നായിരുന്നു.

ആശ്രമത്തിലെ പ്രധാന മന്ദിരങ്ങൾ

സബർമതി ആശ്രമം ഇന്ന് ഒരു സംരക്ഷിതസ്മാരകമാണ്. ആശ്രമകത്തിനകത്ത് സ്ഥിതിചെയ്യുന്ന ഗാന്ധി സ്മാരക സംഗ്രഹാലയം ഇന്ന് ഗുജറാത്തിലെത്തുന്ന അനേകം സഞ്ചാരികളെ ആകർഷിക്കുന്നു. ആശ്രമപരിധിക്കുള്ളിലെ ഈ സംഗ്രഹാലയ മന്ദിരം ചാൾസ് കോറിയ രൂപകല്പന ചെയ്തതാണ്.

ഹൃദയ് കുഞ്ജ്:

ആശ്രമത്തിനുള്ളിൽ ഗാന്ധിജി താമസിച്ചിരുന്ന വീടാണ് ഹൃദയ്കുഞ്ജ്. ഗാന്ധി സംഗ്രഹാലയം പ്രാരംഭത്തിൽ ഇവിടെയാണ് പ്രവർത്തിച്ചിരുന്നത്. പിന്നീട് സംഗ്രഹാലയം പുതിയ മന്ദിരത്തിലേക്കുമാറ്റി. 1963 മെയ് 10-ന് അന്നത്തെ പ്രധാനമന്ത്രിയായിരുന്ന ജവഹർലാൽ നെഹ്രുവാണ് പുതിയ സംഗ്രഹാലയം ഉദ്ഘാടനം ചെയ്തത്.

നന്ദിനി:

ഹൃദയ്കുഞ്ജിന്റെ വലതുഭാഗത്തായ് സ്ഥിതിചെയ്യുന്ന പഴയ ആശ്രമ അതിഥിമന്ദിരമാണ് നന്ദിനി. അന്ന് ആശ്രമത്തിലെത്തിയിരുന്ന ഇന്ത്യക്കാരും വിദേശീയരും താമസ്സിച്ചിരുന്നത് ഇവിടെയാണ്.

വിനോബാ കുടീരം:

ആശ്രമത്തിലെത്തിയ ആചാര്യ വിനോബാ ഭാവേ താമസിച്ചിരുന്ന് ഇവിടെയാണ്. അദ്ദേഹത്തിന്റെ ബഹുമാനാർഥമാണ് ഈ വീടിന് വിനോബാ കുടീർ എന്ന പേരുനൽകിയത്. ഇതിനോടുചേർന്നു നിൽക്കുന്ന മന്ദിരമാണ് മീരാ കുടീരം.

ഉപാസനാ മന്ദിരം:

ഹൃദയ്കുഞ്ജിനും മഗൻ കുടീരത്തിനും ഇടയിൽ സ്ഥിതിചെയ്യുന്ന പ്രാർത്ഥനാലയമാണ് ഇത്. പ്രാർത്ഥനകൾക്കു ശേഷം ഗാന്ധിജി ആശ്രമവാസികളുടെ സംശയങ്ങൾ നിവർത്തിച്ചുകൊടുത്തിരുന്നതും അവരുമായ് സംവദിച്ചിരുന്നതും ഇവിടെവെച്ചാണ്.

വിനോബാ കുടീരം

സംഗ്രഹാലയത്തിന്റെ പ്രത്യേകതകൾ

“എന്റെ ജീവിതമാണ് എന്റെ സന്ദേശം” ചിത്രശാല,ഗാന്ധിജിയുടെ ജീവിതത്തിലെ 250ഓളം ചിത്രങ്ങൾ ഇവിടെ പ്രദർശിപ്പിച്ചിരിക്കുന്നു.

1915-1930 കാലയളവിൽ ഗാന്ധിജി അഹമ്മദാബാദിൽ താമസിച്ചിരുന്നു. ഈ നാളുകളിലെടുത്ത അദ്ദേഹത്തിന്റെ ചിത്രങ്ങളും ഇവിടെ പ്രദർശിപ്പിച്ചിട്ടുണ്ട്

ഗാന്ധിജിയുടെ എണ്ണഛായ ചിത്രങ്ങളുടെ പ്രദർശനകേന്ദ്രം

ഗാന്ധിവാക്യങ്ങളുടെയും, എഴുത്തുകളുടെയും അദ്ദേഹം ഉപയോഗിച്ചിരുന്ന വസ്തുക്കളുടെയും പ്രദർശനകേന്ദ്രം

ഗാന്ധിജിയുമായ് ബന്ധപ്പെട്ട പുസ്തകങ്ങൾ ശേഖരിച്ചു വെച്ചിരിക്കുന്ന ഗ്രന്ഥാലയം. ഏകദേശം 35000ത്തോളം പുസ്തകങ്ങൾ ഇവിടെയുണ്ട്

ആശ്രമം പുസ്തകശാല: പ്രതിഫലേച്ഛകൂടാതെ പ്രവർത്തിക്കുന്ന ഒരു സ്ഥാപനമാണിത്. ഗാന്ധിജിയെ സംബന്ധിക്കുന്ന പുസ്തകങ്ങളും സാഹിത്യ സൃഷ്ടികളും ഇവിടെനിന്നും ലഭ്യമാണ്.