സ്കൂൾ അധ്യാപകന്റെ മുൻകൂർ ജാമ്യാപേക്ഷ കോടതി തള്ളി.

കോഴിക്കോട്: വിദ്യാർഥികൾക്ക് മുന്നിൽ നഗ്നതാ പ്രദർശനം നടത്തിയെന്ന കേസിൽ സ്കൂൾ അധ്യാപകന്റെ മുൻകൂർ ജാമ്യാപേക്ഷ കോടതി തള്ളി. അത്തോളിയിലെ ഹൈസ്കൂൾ അധ്യാപകനായ വി.കെ. ദിലീപിന്റെ മുൻകൂർ ജാമ്യാപേക്ഷയാണ് കോഴിക്കോട് ജില്ലാ സെഷൻസ് കോടതി തള്ളിയത്.

അധ്യാപകൻ നഗ്നതാ പ്രദർശനം നടത്തിയെന്ന് കാണിച്ച് സ്കൂളിലെ ഏഴാംക്ലാസ് വിദ്യാർഥികളാണ് പ്രധാനാധ്യാപികയ്ക്ക് പരാതി നൽകിയത്. തുടർന്ന് പ്രധാനാധ്യാപിക അത്തോളി പോലീസിന് പരാതി കൈമാറി.

സംഭവത്തിൽ മൂന്ന് കുട്ടികളുടെ മൊഴി രേഖപ്പെടുത്തിയ പോലീസ്, പോക്സോ നിയമപ്രകാരമാണ് അധ്യാപകനെതിരേ കേസെടുത്തത്. പോലീസ് കേസെടുത്തതിന് പിന്നാലെയാണ് അധ്യാപകൻ മുൻകൂർ ജാമ്യാപേക്ഷയുമായി കോടതിയെ സമീപിച്ചത്.